CONTACONTOS FAMILIARES EN ED.INFANTIL: EMMA

 Hoxe tivemos unha visita moi especial en Educación Infantil:

O pai e a nai de Emma viñeron compartir con nós un momento precioso arredor da lectura. Foi o seu papá, Emmanuel, quen nos leu o conto “Vera la aventurera”, da colección As Fantasticotas, o libro preferido de Emma.

Contounos que na casa len un cachiño cada día, convertendo a lectura nun momento especial en familia. E hoxe Emma tamén quixo formar parte da historia: axudou ao seu pai lendo algunha páxina, con moita ilusión e seguridade. Foi un orgullo vela participar así!

O alumnado estivo moi atento, gozando da historia e da sorpresa de ter uns papás contacontos outro día máis. Encántanos abrir as portas da nosa biblioteca ás familias e compartir xuntas experiencias que fomentan o amor polos libros desde ben pequeniños.

Moitas grazas á familia de Emma por vir, por compartir o seu tempo e por regalarnos este momento tan bonito!

ENTROIDO GALÁCTICO 2026

 O noso centro celebrou un Entroido Galáctico inesquecible! 🚀✨

Este ano viaxamos polo universo con disfraces de planetas, estrelas e astronautas, e preparamos un divertido photocall galáctico no que participaron todos os cursos, deixando fotos cheas de creatividade e ilusión. Podedes ver todas as fotos AQUÍ.

Visita ao IES As Bizocas 

Un dos momentos máis especiais foi a visita ao IES As Bizocas, que nos convidou ao seu Festival de Bandas Sonoras. Estamos moi agradecidos pola invitación e pola acollida. Grazas Belén, a profe de música do IES e a todo o claustro por convidarnos!

Encantounos ver a conexión do alumnado, o ben que se organizaban e o bo ambiente que había.

Nós tamén actuamos co baile que preparamos en Música e Danza: “Carnivalito” de Shenigans. É unha peza moi alegre e dinámica, con ritmos inspirados no entroido latinoamericano, que nos fixo traballar a coordinación e, sobre todo, gozar bailando en grupo.

Merenda e desfile 

De volta ao cole, compartimos unha deliciosa merenda doce típica de Entroido. Moitísimas grazas ás familias pola vosa colaboración e por acompañarnos.

Aínda que non o tiñamos claro polo tempo, a choiva deunos unha tregua e puidemos facer o desfile fóra. Lucimos os nosos disfraces galácticos e bailamos de novo para as familias.

Foi un día cheo de alegría, convivencia e moita festa. Grazas ás familias por participar e formar parte destes momentos tan especiais! 💙✨

OBRADOIRO CIENTÍFICO POLO DÍA DA MULLER E A NENA NA CIENCIA

x

O mércores 11 de febreiro celebramos no cole o Día Internacional da Muller e da Nena na Ciencia dunha maneira moi especial: coa visita do obradoiro “Ciencia en Movimiento”, cun taller en sobre o espazo e o sistema solar, seguindo co noso proxecto sobre o Universo.

Durante a xornada, todo o alumnado de Educación Infantil e Educación Primaria asistiu á exposición e puido ver e participar en diferentes experimentos que nos axudaron a comprender mellor as estrelas, as galaxias e o espazo.

Tamén coñecemos o traballo de mulleres científicas moi importantes na historia da astronomía. Faláronnos de Henrietta Leavitt, cuxos estudos sobre as estrelas permitiron medir mellor as distancias no Universo, e de Jocelyn Bell Burnell, descubridora dos púlsares cando aínda era estudante.

Foi unha actividade moi interesante e enriquecedora, na que aprendemos ciencia e puxemos en valor o papel das mulleres no mundo científico.

Seguimos explorando o Universo con curiosidade e ilusión! 🚀✨

CONTACONTOS FAMILIARES EN ED. INFANTIL: SABELA

 Esta semana tivemos unha visita moi especial no cole. A familia de Sabela quixo compartir con nós un momento moi bonito e veu Maribel a facernos un fantástico contacontos.

Maribel contounos dúas historias moi divertidas: “A vaca que puxo un ovo” e “Primeira semana na escola de vacas”. Escoitamos con moita atención e participamos durante os contos. Fíxoo xenial e encantounos a súa maneira de contar as historias!

Pero a sorpresa non acabou aí…  Tamén trouxo un proxector de estrelas e constelacións, que nos permitiu observar o teito da aula como se fose o ceo nocturno. Foi unha experiencia máxica que nos axudou a seguir aprendendo sobre o Universo, relacionándoo co noso proxecto.

Moitas grazas á familia de Sabela e, especialmente, a Maribel por compartir este momento tan especial con nós. Encántanos contar coa participación das familias no cole! 

OS RELATOS DE MEDO XA ESTÁN AQUÍ!

Nas últimas sesións do club de lectura fomos á Radio Sabichón do cole para vivir unha experiencia moi especial. Despois de ler Relatos de pantasmas, traballamos en grupo para crear os nosos propios relatos de medo, cheos de misterio e imaxinación.

Cando os relatos estiveron listos, gravámolos na radio. Alí aprendemos como funciona unha emisora, usamos os micrófonos e sentimos o que é falar na radio de verdade. Foi unha actividade moi divertida e diferente.

Encantounos a experiencia e pasámolo xenial como locutores por un día. Os audios xa están listos para escoitar! 

PINCHADE AQUÍ!

OBRADOIRO CIENTÍFICO: HOLOGRAMAS DO SISTEMA SOLAR POLO DÍA DA MULLER E A NENA NA CIENCIA

Este mércores 11 de febreiro tivemos no cole unha actividade moi especial dentro do PDI sobre o espazo. 

O alumnado de 5º de Educación Primaria foi o encargado de impartir un obradoiro científico, organizado coa axuda da súa profe Sandra, que coordinou todo con moito agarimo.

O obradoiro celebrouse o mércores 11 de febreiro, coincidindo cunha data moi significativa: o Día da Muller e a Nena na Ciencia. Unha ocasión perfecta para seguir espertando a curiosidade científica no noso alumnado.

Durante a actividade, explicaron que son os hologramas, como funcionan e para que se utilizan, e puidemos ver o sistema solar a través deste efecto, facendo a aprendizaxe aínda máis visual, sorprendente e divertida 

Unha experiencia na que o alumnado aprende, investiga e comparte coñecementos, converténdose en auténticos divulgadores científicos.

📅 Incluímos o horario de cada clase para que todos e todas poidan participar nesta interesante proposta.

Parabéns ao alumnado de 5º e á súa profe pola iniciativa e polo traballo realizado.

Seguimos explorando o espazo… desde o cole 🚀