O pasado mércores 17 de xuño vivimos un dos momentos máis especiais do noso proxecto PDI Bizocas en Órbita. Despois de todo un curso investigando, creando, experimentando e aprendendo arredor do espazo, chegou o momento de compartir o resultado con quen mellor nos coñece: as nosas familias.
Para participar nesta experiencia tan especial, as familias tiveron que inscribirse previamente e, uns días antes, recibiron a súa entrada para a viaxe intergaláctica, o seu pasaporte para embarcar nesta aventura espacial que o noso alumnado preparara con tanta ilusión.
Foi unha xornada chea de emocións, ilusión e moitísimo orgullo, na que cada curso presentou o seu produto final para ensinar todo o aprendido ao longo destes meses. Porque aprender tamén é saber comunicar, explicar, sorprender... e desfrutar compartindo o que se fai na escola.
👶 Educación Infantil: unha viaxe polo espazo en vídeo
Os máis pequenos e pequenas prepararon un vídeo no que recollen algunhas das experiencias, actividades e descubrimentos que viviron durante este apaixonante proxecto. Un recordo moi especial que permite ver todo o que foron aprendendo dunha maneira moi visual e divertida.
👉 Podes velo aquí: https: https://boxabalar.edu.xunta.gal/index.php/s/LPPmkjHkE4mz5Cd
📖 1º Ciclo de Educación Primaria: o alumnado toma a palabra
O alumnado de 2º de Primaria foi o encargado de realizar unha presentación na que, con indicacións preparadas por eles mesmos, foron explicando ás súas familias as diferentes actividades desenvolvidas ao longo do curso.
Con moita seguridade, ilusión e entusiasmo convertéronse nos mellores guías posibles para contar todo o aprendido sobre o universo, os planetas, as misións espaciais e moitas curiosidades máis.
Podedes ver a presentación no pinchando aquí
🎭 2º Ciclo: un teatro de sombras para recordar o importante
O alumnado de 3º e 4º de Primaria emocionou a todas as persoas asistentes cun precioso teatro de sombras.
A través dunha historia chea de sensibilidade, conseguiron relacionar o espazo cunha idea moi especial: a importancia da memoria e do recordo. A súa moraleja invitábanos a valorar todos eses momentos, persoas e experiencias bonitas que permanecen para sempre na nosa memoria, igual que as estrelas permanecen iluminando o ceo.
Unha actuación que arrancou moitos aplausos... e tamén algunha emoción.
🧩 5º de Primaria: unha misión espacial para toda a familia
En 5º de Primaria as familias convertéronse en auténticas astronautas por un día.
Prepararon unha completa serie de retos e probas que había que superar en equipo. A aventura comezaba cunhas preguntas iniciais que permitían avanzar cara aos diferentes desafíos:
- descubrir datas importantes relacionadas coa exploración espacial mediante pequenas adiviñas;
- observar as constelacións nun pequeno cuarto escuro preparado para a ocasión;
- resolver un labirinto deseñado polo propio alumnado e elaborado coa cortadora láser;
- buscar pistas escondidas por todo o colexio relacionadas coa información traballada durante o proxecto;
- superar diferentes probas nas que a cooperación e a curiosidade eran fundamentais.
- e máis probas...
Un auténtico escape espacial no que aprender e divertirse foron da man, podedes ver máis do seu produto final AQUÍ.
🤖 6º de Primaria: programando o Sistema Solar
O alumnado de 6º de Primaria sorprendeu ás familias cunha demostración do seu traballo de programación e pensamento computacional.
Empregando os mBots e Scratch, programaron a representación da órbita dos planetas arredor do Sol tomando como referencia a Terra. Ademais, explicaron as enormes distancias que existen entre os planetas mediante unha representación a escala, debuxada no teito da aula, que axudou a comprender mellor as dimensións do noso Sistema Solar.
A súa exposición rematou cunha interesante reflexión sobre a importancia de coidar o planeta Terra, o único fogar que temos, analizando tamén os beneficios que achega a tecnoloxía á nosa sociedade, pero sen esquecer os posibles riscos e a necesidade de facer un uso responsable dela.
💙 Unha misión compartida que chegou ao seu destino
Ao rematar o percorrido, todas as familias cubriron unha rúbrica de valoración, na que puideron expresar a súa opinión sobre a experiencia e achegarnos as súas impresións. As súas valoracións axúdannos a seguir mellorando e confirman que abrir as portas da escola para compartir a aprendizaxe sempre merece a pena.
Como recordo desta viaxe espacial, cada familia recibiu tamén unha chapa co logotipo do noso PDI Bizocas en Órbita, elaborada polo propio alumnado do centro, un pequeno agasallo que simboliza todo o traballo, a creatividade e a ilusión que acompañaron este proxecto durante todo o curso.
Este encontro foi o broche perfecto para un PDI no que investigamos o universo, descubrimos curiosidades sobre o espazo, programamos, creamos, reflexionamos, cooperamos e comprendemos que mirar cara ás estrelas tamén nos axuda a valorar mellor o noso planeta e todo o que nel vivimos.
Queremos agradecer de corazón a asistencia e implicación de todas as familias. A súa presenza converteu esta exposición nun auténtico éxito e demostrou, unha vez máis, que cando escola e familias camiñan na mesma dirección, a aprendizaxe chega moito máis lonxe.
🚀 A nosa viaxe por Bizocas en Órbita remata aquí... pero a curiosidade por seguir descubrindo o universo continuará acompañándonos nas próximas aventuras.
