A VOSA OPINIÓN CONTA..E MOITO!

 Na nosa biblioteca gústanos facer un montón de actividades, descubrir historias, investigar, crear e aprender xuntos. Pero… sabedes que é o máis importante? Coñecer a opinión do noso alumnado!

Por iso, durante estes días, todos os nenos e nenas do cole participaron nunhas enquisas moi especiais. Nelas puideron valorar as actividades da biblioteca, dicindo se lles gustaron moito, pouco ou nada, e tamén compartir as súas ideas para seguir mellorando este espazo que é de todos e todas.

Ademais, deixáronnos propostas de novos libros que lles gustaría atopar nas estanterías, suxestións para facer a biblioteca aínda máis divertida e… unha pregunta moi importante: sobre que temática lles gustaría investigar o vindeiro curso no noso PDI. Iso si, ese segredo gardarémolo un pouquiño máis… ¡xa o desvelaremos cando chegue o momento! 🤫✨

Para nós, estas enquisas son moito máis ca unhas simples preguntas. Son unha oportunidade para que o alumnado participe, dea a súa opinión e vexa que as súas ideas teñen valor. Porque unha biblioteca viva constrúese entre todos e todas.

Grazas a todos e todas por participar! Agora tócanos escoitar, tomar boa nota das vosas ideas e seguir traballando para que a nosa biblioteca sexa cada día un lugar máis especial.

CONTACONTOS EN ED. INFANTIL: LUZ

 O pasado venres 28 tivemos unha visita moi especial na nosa biblioteca. Luz, a nai da profe Lucía, achegouse ao cole para compartir co noso alumnado unha fermosa sesión de contacontos.

A primeira historia foi Estelaluna, a entrañable aventura dun pequeno morcego que, tras medrar nun niño de paxaros, intenta comportarse como eles ata descubrir que o máis importante é aceptarse a un mesmo e seguir a propia esencia. A segunda foi Un pouco perdido, un divertido conto no que un pequeno mouchiño busca á súa nai coa axuda dos animais que vai atopando polo camiño, demostrando o valor da amizade e da colaboración.

Dúas historias diferentes, pero cunha mensaxe común: a importancia de ser quen somos, de respectar as diferenzas e de axudarnos uns aos outros. Entre risas, preguntas e moita participación, pasamos un anaco moi agradable gozando da maxia dos libros e das historias compartidas.

Queremos agradecerlle a Luz a súa visita e o cariño co que nos agasallou esta actividade. Agardamos volver contar con ela moi pronto para seguir descubrindo novos contos e aventuras! 💛📖

DESPEDIDA DO PODCAST SABICHÓN...ATA O VINDEIRO CURSO

 🎖️ Un recoñecemento moi especial para os nosos pequenos grandes xornalistas!

O final de curso sempre vén cargado de emocións, pero este ano quixemos facelo aínda máis especial. Despois de apagar os micrófonos e dar por rematada a última gravación do noso Podcast Sabichón, o equipo docente tiña preparada unha sorpresa para o alumnado de 5º de Educación Primaria que se comprometeu con este proxecto radiofónico.

Para agradecer o seu esforzo, a súa ilusión e as horas de traballo que dedicaron ao longo de todo este curso, fíxoselles entrega dunha carta de recoñecemento oficial polo seu gran labor como reporteiros e reporteiras.

Pero as sorpresas non remataron aí! O momento máis emocionante chegou coa entrega dun detalle moi simbólico: unha medalla/chaveiro súper especial que serve para estrear oficialmente o novo logotipo de Radio Sabichón. O máis bonito de todo é que este deseño tan identitario foi creado polas propias alumnas que participan no podcast, demostrando que o talento neste colexio non ten límites.

Queremos dar os parabéns e agradecer publicamente a Aarón, Naima, Gisela, Zaira e Rocío por ser a voz e o motor deste proxecto. Grazas por contaxiarnos a vosa curiosidade e por demostrar que, con traballo en equipo, pódense facer cousas marabillosas. 

Levades ben merecido ese recoñecemento!

Agora si, desexámosvos un moi feliz verán! ☀️🌊

PODCAST SABICHÓN - XORNALISMO CON LETICIA CASTRO

🎙️ O Podcast Sabichón pon o broche de ouro ao curso cunha convidada de luxo!

Ola a todas e a todos! A curiosidade non descansa no CEIP As Bizocas, e boa proba diso é o último episodio do curso do Podcast Sabichón. Nesta ocasión, os nosos reporteiros e reporteiras de 5º de Educación Primaria —Aarón, Naima, Gisela, Zaira e Rocío— tomaron os mandos dos micrófonos para ofrecernos unha entrevista espectacular.

Despois de contar no anterior episodio con Víctor Gallego , desta volta visitounos no estudio unha persoa que tiña o seu futuro clarísimo desde os seis anos: a xornalista Leticia Castro.

Leticia, que actualmente traballa como redactora en La Voz de Galicia e coordina a nova revista Salghadoiro, compartiu co alumnado os segredos do seu día a día. Durante a conversa, os nosos rapaces e rapazas de 5º afondaron con ela en temas fundamentais da profesión:

• Como se realiza unha boa recollida de información.

• A importancia crucial de contrastar os datos antes de publicar.

• Os seus múltiples proxectos de deseño, a súa marca propia e o seu paso por Grovemakers.

Ademais, non podiamos perder a oportunidade de saber que pensa unha profesional dos medios sobre o noso traballo, e Leticia compartiu a súa valoración sobre o Podcast Sabichón, o que nos encheu de orgullo e ilusión para seguir mellorando.

Para rematar dun xeito divertido, os nosos podcasters puxeron a proba a axilidade mental da xornalista co xogo da palabra intrusa. O alumnado foille dando diferentes listas de palabras e Leticia tivo que adiviñar cal delas non pintaba nada e, o máis difícil... ¡explicar o porqué! Foi un momento cheo de risas e enxeño.

"Quedounos moi claro que se tes un soño desde a infancia, con traballo, ilusión e moita creatividade, podes facer realidade todo o que te propoñas."

Con esta entrevista tan especial poñemos o broche de ouro e o punto final aos podcasts deste curso. Queremos dar as grazas de corazón a Leticia Castro por compartir o seu tempo e a súa historia con nós , e tamén a todas as persoas que estivestes ao outro lado dos altofalantes acompañándonos en cada aventura.

Ligazón a entrevista: https://drive.google.com/file/d/1ca79V-4EMzEqtxy4WqwcqHgWHYQRlF5Z/view?usp=sharing

Agora toca gozar dun merecido descanso. Ide preparando os oídos, porque o ano que vén volveremos con moitas máis sorpresas e máis ganas de seguir aprendendo!

Feliz verán a todos os sabichóns e sabichonas! 🌊☀️

FINALIZAMOS O VOLUNTARIADO DE BIBLIOTECA!

 A nosa biblioteca non sería o que é sen a axuda desas persoas tan especiais que colaboran cada semana con nós: o noso voluntariado de biblioteca.

Durante todo o curso, estiveron aí: organizando libros, preparando actividades, axudando cos préstamos, decorando espazos… e sempre cun sorriso e moitas ganas de sumar.

Foron un apoio imprescindible para que a nosa biblio siga sendo un lugar vivo, cheo de historias, lecturas e encontros. Por iso, agasallámolos cun diploma de recoñecemento á participación! Noraboa!

Seguimos construíndo este espazo lector entre todos e todas! Agardamos que para o curso que ven sigades construíndo a biblioteca entre todas vos!

BIZOCAS EN ÓRBITA, EXPOSICIÓN DO PDI ÁS FAMILIAS!

 Este curso no cole estivemos a tope investigando co espazo, os planetas e galaxias, as estrelas... e toodo o relacionado co universo.

E agora... toca ensinarvos todo o que aprendemos no noso Proxecto Documental Integrado deste curso 25/26 "Bizocas en órbita"! 

👉 Faremos unha exposición do noso PDI no cole e as familias estades oficialmente convidadas!

Para iso, teredes que anotar no seguinte formulario cantas persoas van acudir de cada familia, para poder organizar todo da mellor forma posible!  Ollo: se non vos inscribides, non poderedes asistir! 

 O último día para anotarvos será o luns 8 de xuño! 

📍 Onde? No cole, claro!

🕒 Cando?  Mércores 17 de xuño de 11:00 a 13:30h. ⚠️ MOI IMPORTANTE SER PUNTUAIS!

👀 Que ides ver?  Pasaredes en pequenos grupos polas 5 estacións que teremos preparadas (Infantil, 1º ciclo, 2º ciclo, 5º e 6º de EP) durante 15 minutiños en cada unha, onde o alumnado de cada ciclo vos irá explicando os seus traballos ao longo do curso.  Ao rematar, teremos 30 minutos para facer libremente diferentes retos cos vosos fillos e fillas onde o pasaredes moi ben aprendendo e xogando!

Enlace para inscribirse: https://forms.gle/M6dV3V9nGicFNLRY7

💬 Traede os ollos ben abertos e moitas ganas de aprender co talento do noso alumnado.

Animádevos a asistir! As familias tamén formades parte desta aventura espacial, a vosa visita é o mellor aplauso para o noso alumnado, que puxo corazón, cor e moita imaxinación en cada exposición. así que aquí vos esperamos! Ata o infinito e máis alá!