O pasado venres 20 de xuño vivimos un deses días máxicos no CEIP As Bizocas: abrimos as portas do cole para compartir con todas as familias o traballo realizado ao longo do curso no Proxecto Documental Integrado (PDI). E que traballo! Foron meses de investigación, creación e moito entusiasmo arredor dun tema que nos encantou: as sete artes !
As familias chegaron ao cole ben puntuais, coa entrada de cine que recibiron nas súas casas todas aquelas que se inscribiran previamente! Ademais, tamén recibiron un pequeniño bote de palomitas de benvida, isto parece un verdadeiro cine!
A continuación dividímonos en 4 grupiños para pasar á parte máis máxica: Cada ciclo preparou unha zona temática na exposición, co alumnado como auténtico guía. Foron eles e elas quen explicaron o proceso, contaron anécdotas, ensinaron as súas creacións e deron vida á mostra. Un auténtico museo vivinte e dinámico no que a aprendizaxe saíu das aulas e se converteu en experiencia compartida.
E como broche final… os retos artísticos para as familias (os retos que o alumnado do Bizocas foi resolvendo ao longo do curso!)
Durante media hora, peques e maiores xogaron, crearon e riron xuntos nun espazo cheo de propostas ubicados en diferentes puntos do centro: memory, crucigramas, teatro de sombras, croma, buscar letras nos cadros, recoñecer esculturas... é dicir, todos os retos que os nenos e nenas das bizocas foron resolvendo ao longo do curso!
As 7 artes protagonistas:🎭 Teatro – xogamos a ser actores e actrices, fixemos dramatizacións, aprendemos o que é un guión, un escenario… e ata inventamos personaxes!
🎶 Música – descubrimos instrumentos, ritmos, sons do mundo e puxemos banda sonora á nosa vida escolar. Algúns grupos incluso crearon as súas propias cancións!
🎬 Cine – aprendemos como se fai unha película, exploramos o mundo dos planos, os xéneros, o guión e mesmo gravamos pequenos curtas, e ata experimentamos co croma!
🎨 Pintura e artes plásticas – experimentamos con materiais, cores, estilos e artistas de todos os tempos. As aulas enchéronse de cadros e obras orixinais.
🏛 Arquitectura – fixemos maquetas, exploramos construcións do mundo e mesmo deseñamos espazos soñados. Aprendimos a mirar os edificios con outros ollos.
📚 Literatura – mergullámonos en contos, poemas e historias creadas por nós, ilustrámolas e compartímolas coas familias.💃 Danza – expresamos emocións co corpo, coñecimos diferentes estilos e culturas, e gozamos do movemento como forma de arte.
Ao rematar, as familias que se inscribiron tiveron un pequeno agasallo: un boli personalizado co sello das Bizocas! Con eles, cubriron unha rúbrica de avaliación para as familias, onde indicaron o seu nivel de satisfacción coa exposición da PDI.
Foi unha mañá para lembrar, na que o esforzo de todo o curso cobrou sentido. Queremos dar as grazas:
🌟 Ao alumnado, por poñerlle tantas gañas e tanto corazón.
🌟 Ao profesorado, por facer posible este proxecto con dedicación, paixón e moita arte.
🌟 E ás familias, por vir, acompañar, participar e emocionarse con nós. Agardamos que para o vindeiro curso vos animedes a volver!
Esta exposición foi moito máis ca unha mostra de traballos: foi unha celebración do que significa aprender creando, facer comunidade e converter a escola nun espazo vivo, activo e cheo de posibilidades.
Porque nas Bizocas, a aprendizaxe é unha obra de arte 🎨💥 E así damos por finalizada a PDI 24/25 PEQUEN@S ARTISTAS!
Pinchade AQUÍ para ver todas as fotos!
.jpg)
