UNHA VIAXE MUSICAL POLO UNIVERSO DE STAR WARS

Ao longo deste trimestre, o alumnado de 5º de Educación Primaria estivo a traballar con moita ilusión na interpretación da Banda Sonora de Star Wars, empregando frautas e boomwhackers na materia de Música e Danza. Esta actividade enmárcase no noso PDI "Bizocas en órbita", a través do cal seguimos descubrindo o fascinante mundo do espazo desde diferentes áreas.

Despois de moitos ensaios, aprendizaxes e traballo en equipo, hoxe, luns 15 de xuño, chegou o gran momento: compartir o resultado co resto do alumnado do centro nunha pequena representación. Os sons máis coñecidos desta saga acompañáronnos nunha actuación chea de ritmo, concentración e emoción, na que os nosos músicos e músicas demostraron todo o esforzo realizado durante estes meses.

Queremos felicitar ao alumnado de 5º polo seu compromiso e entusiasmo, e tamén agradecer ao público o seu silencio e os seus aplausos, que fixeron desta actuación un momento moi especial.