DEBUXANDO ÁS NOSAS AVOAS NO CLUB DE LECTURA

Nestas derradeiras sesións do club de lectura (martes 22 en 5º e martes 29 en 6º), seguimos avanzando na lectura do libro e nos debuxos das nosas avoas.     
                                    
Ademais, cada un debuxou a parte máis artística de cada avoa, polo que nos atopamos con avoas cociñeiras, pintoras, costureiras... e moitas outras artes que iremos descubrindo!
 
Vémonos nas próximas sesións do club! Xa queda pouquiño para rematar e libro e para desvelar a actividade que imos facer en relación a el!

CHARLAS DO PLAN DIRECTOR EN 5º E 6º DE EP

Este curso volvemos contar coas formacións do Plan Director para 5º e 6º de EP, que se levaron a cabo o xoves 17 de outubro.

Nestas formacións, impartidas por un membro da  Garda Civil, trátanse diversas temáticas relacionadas coa protección de menores e adolescentes e o seu dereito á seguridade persoal como por exemplo: a ciberseguridade, o acoso escolar, as drogas e o alcol, as novas adicións, os delitos de odio e discriminación ou a prevención dos delitos sexuais. 

Neste caso, as charlas centraronse na violencia de xénero e a ciberseguridade.

                                            

TEATRO POLO DÍA DAS BIBLIOTECAS

O 24 de outubro celebrase o Día das Bibliotecas, e o noso alumnado celebrouno asistindo a unha obra de teatro na Axencia de Lectura de San Vicente. A obra titulabase "A cabaza encantada" a cargo do Teatro Calavera, encantounos!

Aquí vos deixamos un vídeo resumo da actividade! 

Nesta obra de teatro os protagonistas, o Cociñeiro Antón e a pasteleira Tomasa viven unha aventura para rir de medo. Un día Antón plantou unha semente, nunha maceta corrente, botoulle auga e terra e mantívose á espera. Agardou e agardou e co tempo medrou...unha cabaza! Era unha cabaza especial, á que lle gustaba asustar.

FORMACIÓN DE USUARIOS NO 3º CICLO

O alumnado de 3º ciclo recibiu a formación de usuarios para coñecer e ser partícipes do funcionamento e organización da biblioteca. 

Ademais, os voluntarios e voluntarias de biblioteca serán encargados de realizar os empréstitos e devolucións de libros durante os recreos, entre outras funcións.

                                 

Ao remate da formación, o alumnado realizou unha pequena actividade onde deberían poñer a proba os seus coñecementos en relación á CDU da biblioteca, o sistema de catalogación e organización da biblioteca que empregamos.

A PRIMEIRA FASE DO PROXECTO XA ESTÁ EN MARCHA

Logo de elixir a temática do proxecto deste curso e o título do mesmo, comezamos xa coa primeira fase:

 QUE SABEMOS SOBRE A ARTE? QUE QUEREMOS SABER?

Cada ciclo centrarase nunha arte en concreto, por exemplo: o 1º ciclo traballará a pintura, 2º ciclo a arquitectura e o 3º ciclo o cine. Educación Infantil traballará diferentes artes ao longo de todo o curso.

Comezaremos resolvendo estas preguntas que nos guiarán e servirán de punto de partida nas nosas investigacións.

Aquí vos deixamos un vídeo sobre a 1ª fase en Educación Infantil! Noraboa polo traballo pequen@s artistas!: 

TEMPOS DE LECER NA BIBLIOTECA

Este curso escolar temos novas quendas para os tempos de recreo: 

Os luns e mércores poden acudir nenos e nenas de 1º e 2º  de Educación Primaria; os martes e xoves son os días reservados para o alumnado de 3º e 4º de Ed. Primaria, e os venres para 5º e 6º de EP.

Coma sempre o recreo é o momento de ocio máis importante da mañá e temos moitos usuarios que veñen para xogar con xogos de mesa, xogos de lóxica, ler, puzzles...

CONCURSO DE DEBUXO: DESEÑA O LOGO DO PDI 24/25

 Xa temos aquí o concurso para o deseño do logo do PDI deste curso:

Os requisitos son: 

• Debe levar o nome do proxecto: "Pequen@s artistas".
• Debe incluir o nome do cole e o ano CEIP AS BIZOCAS 24/25 .
• Facer un debuxo relacionado coa arte.

 

Moita sorte!

XA TEMOS TÍTULO PARA O PDI 24/25!

Tras as propostas realizadas nas asembleas de todos os cursos, que foron entregadas no buzón Sabichón, recollemos un montón de ideas para o título da PDI deste curso, na que a temática  principal (tamén elixida polo alumnado) será a arte.

Finalmente, o título escollido foi: PEQUEN@S ARTISTAS!

                                        

           

A AVOA GÁNSTER NO CLUB DE LECTURA

Nestas segundas sesións do club de lectura (o martes 8 co alumnado de 5º e o martes 15 co alumnado de 6º) comezamos a comentar os primeiros capítulos do libro! 

Ademais, como os protagonistas do libro son Ben e a súa avoa, comezamos a debuxar ás nosas avoas para propoñerlles unha pequena sorpresa que desvelaremos máis adiante...

 Mentres tanto, seguiremos adentrándonos na historia desta avoa misteriosa! 

Vémonos no seguinte club !

AS MOCHILAS VIAXEIRAS XA ESTÁN EN MARCHA!

 As voluntarias de biblioteca foron as encargadas de repartir as mochilas viaxeiras de cada curso e lembrarlles como funcionan! 

Como xa sabedes, cada curso contará cunha mochila viaxeira, que inclúe libros, cómics, revistas... para que alumnado e familias disfruten xuntos do tempo de lectura.

O contido das mochilas é sorpresa... que intriga!💭

Ademais, cada mochila contará cun diario, onde os nenos e nenas reflexarán os libros que máis lles gustaron a través de debuxos, resumos, fotos lendo... e todo o que a vosa imaxinación queira! 

Esta mochila viaxará cada semana a unha familia diferente, polo que todo o alumnado e familias poderán disfrutar deste fantástico agasallo durante unha semana. É importante respectar os prazos e coidar o material para que todos e todas gozemos da mochila viaxeira.

Ademais, de forma voluntaria, as familias poderedes enviar fotos disfrutando da lectura ao email do cole (ceip.asbizocas@edu.xunta.gal), así poderemos ver o ben que o pasades xuntos!

As voluntarias de biblioteca encargáronse de repartilas en todas as aulas, polo que comeza a súa viaxe!

PRIMEIRA SESIÓN DO CLUB DE LECTURA!

 @s Aventureir@s das Bizocas reuníronse un curso máis para comezar con moitas ganas o Club de Lectura. 

Neste caso fixemos unha reunión conxunta, alumnado de 5º e 6º de EP, na que eliximos entre unha selección de exemplares o libro que máis nos gustaba a todos e todas. 

Finalmente, o elixido foi “A avoa gánster” de David Walliams! 

Comezamos!!

O VOLUNTARIADO DE BIBLIOTECA XA ESTÁ EN MARCHA!

Este curso contamos de novo con voluntariado para axudar na biblioteca de 5º e 6º de Educación Primaria. 

O alumnado voluntario será o encargado de axudar nas tarefas de organización e dinamización das actividades da biblioteca durante os recreos.